काठमाडौं । हाल देशभर नयाँ र पुराना गरी करिब ६ लाख सेवाग्राही सवारी चालक अनुमतिपत्र लाइसेन्सको पर्खाइमा रहेका छन् ।
यातायात व्यवस्था विभागले लाइसेन्सको लागि प्रक्रिया पुरा गरेका ७ लाख सेवाग्राही भएकोमा करिब १ लाख १५ हजार लाइसेन्स भने प्रिन्ट गरेर सम्बन्धित यातायात कार्यालयमा पठाइसकिएको जनाएको छ । विभिन्न कठिनाईका कारण भनेकै समयमा स्मार्ट लाइसेन्स प्रदान गर्न नसकिने बाध्यता रहेको यातायात व्यवस्था विभागका महानिर्देशक नमराज घिमिरेको भनाइ छ । उहाँका अनुसार प्रदेश मन्त्रालय र त्यसअन्तर्गतका कार्यालयमा जनशक्ति र प्रविधिको प्रयोग नबढेसम्म प्रक्रिया पूरा गरे पनि तुरुन्त लाइसेन्स दिन सक्ने अवस्था छैन ।
घिमिरेले विदेश जाने र अति जरुरी परेकालाई चाँडो लाइसेन्स प्रिन्ट गरेर दिनुपर्ने कारण त्यसको पनि लोड परेको हुँदा एक सिफ्ट यसका लागि छुट्याइएको बताउनुभयो । हाल यस्ता सेवाग्रहीले एक हप्ता पश्चात तुरुन्तै लाइसेन्स पाउने व्यवस्था छ ।
विभागमा रहेको मेसिनले एक घण्टामा ४ सय ५० वटा कार्ड छाप्न सक्छ । देशभर २१ वटा यातायात व्यवस्था कार्यालय छन् । काठमाडौंमा रहेका ४ वटा यातायात व्यवस्था कार्यालयमा प्रिन्ट भएको लाइसेन्स पठाइसकिएको विभागका सूचना अधिकारी तथा निर्देशक लोकनाथ भुसालले जानकारी दिनुभयो ।
अहिले नयाँ सवारी चालक अनुमति प्राप्त गर्ने व्यक्तिका लागि एक वर्षको परीक्षणकालीन कार्ड दिइनेछ । परीक्षणकालीन कार्ड सबै यातायात व्यवस्था कार्यालयबाट ट्रायल पास गर्नासाथ पाइन्छ ।
