डडेल्धुरा : प्रधानमन्त्री एवं नेपाली कांग्रेस सभापति शेरबहादुर देउवाले स्थानीय तहको निर्वाचन गराएरै छाडेको दाबी गरेका छन्। केही व्यक्तिले निर्वाचन हुँदैन भनेर हल्ला फिँजाइएको भएपनि आज देशभर निर्वाचन भइरहेको बताएका हुन्।
डडेल्धुरा जिल्लाको गन्यापधुरा गाउँपालिकाको असिग्राम मावि रुवाखोलामा रहेको मतदान केन्द्र ‘ख’ बाट भोट हालेपछि देउवाले सो कुरा बताएका हुन्।एमाले अध्यक्ष ओलीप्रति इङ्गित गर्दै देउवाले भने, ‘चुनाव हुँदैन, मलाई गराउँदैन भन्थे, आज मतदान त भइरहेको छ, केपीजीले पनि मतदान गर्नुभयो होला नि?’
पूर्वप्रधानमन्त्री ओलीले निर्वाचन प्रचार-प्रसारको क्रममा देउवा नेतृत्वको सरकारले चुनावै गराउँदैन भनेका थिए। ओलीको सोही भनाइप्रति लक्षित गर्दै प्रधानमन्त्री देउवाले यो अभिव्यक्ति दिएका हुन्।
साथै उनले निर्वाचन भएपछि लोकतन्त्र सुनिश्चित भएको बताए। प्रधानमन्त्री देउवाले स्थानीय तह गठन भएपछि गाउँगाउँमा सिंहदरबार आएको समेत जिकिर गरे।
धनगढीबाट हेलिकप्टरबाट आएर यहाँ बिहान ९ बजेर ५५ मिनेटमा मतदान गरेका थिए। देउवाले यसै विद्यालयबाट प्रारम्भिक शिक्षा हासिल गरेका थिए। २००३ सालमा जन्मिएका देउवाले कक्षा ३ सम्मको प्रारम्भिक शिक्षा तत्कालीन असिग्राम प्राविबाट लिएका थिए।
कक्षा ८ सम्म डडेल्धुरा सदरमुकामको महेन्द्र माविमा पढेका देउवाले कक्षा ९ र १० सम्मको पढाइ डोटीको जिजोडामाडौं उचाकोटमा रहेको सिताराम माविमा पूरा गरेका थिए।
२०१९ सालमा एसएलसी पास गरेपछि देउवा उच्च शिक्षा अध्ययनका लागि काठमाडौं आएका थिए। देउवा आजै यहाँबाट काठमाडौं फर्किएका छन्।
