काठमाडौं । कलाकार पल शाहलाई थुनामै राखेर बलात्कार मुद्दाको सुनुवाइ गर्नुपर्ने भनी दुई जिल्ला अदालतले गरेको आदेशलाई उच्च अदालत पोखराले सदर गरेको छ ।
नावालिका गायिकालाई बलात्कार गरेको आरोप लागेका कलाकार शाहलाई जिल्ला अदालत कास्की र नवलपुरले थुनामै राखेर मुद्दाको सुनुवाइ गर्नुपर्ने भनी आदेश गरेका थिए ।
दुवै अदालतको आदेश विरुद्ध कलाकार शाह उच्च अदालत पोखरा गएका थिए । उनले आफूलाई साधारण तारिखमा राखेर मुद्दाको सुनुवाइ गर्नुपर्ने माग गरेका थिए ।
न्यायाधीश उज्ज्वल शुक्ल र श्रीधराकुमारी पुडासैनीको इजलासले जिल्लाको आदेश सदर गरेको उपरजिष्टार विष्णुप्रसाद आचार्यले जानकारी दिए । आदेश उदृत गर्दै उनले भने, ‘जिल्ला अदालतबाट भएको आदेश वेरितको नदेखिंदा परिवर्तन गरिहनु पर्दैन भन्ने आदेश भएको छ ।’
उच्च अदालतको आदेश विरुद्ध कलाकार शाहलाई सर्वोच्च अदालतमा निवेदन दिन पाउने बाटो खुला छ । सर्वोच्च अदालतले उच्च अदालत पोखराको आदेश सदर गरेमा कलाकार शाहले थुनामै बसेर दुईवटा बलात्कार मुद्दाको सामना गर्नुपर्छ ।
सर्वोच्च अदालतले उच्च अदालत पोखराको आदेश बदर गरेमा भने उनले धरौटी वा सामान्य तारिखमा बाहिर बसेर मुद्दा लड्ने सुविधा पाउनेछन् ।
उनी विरुद्धको बलात्कारका दुई मूल मुद्दा भने तनहुँ र नवलपुर जिल्ला अदालतमा विचाराधीन छन् ।
