भारतीय राजदूतावासका प्रथम सचिव करुण वंशलले आज कपिलवस्तुको बुद्धभूमि नगरपालिकामा अवस्थित श्री माध्यमिक विद्यालयका लागि निर्मित विद्यालय भवनको उद्घाटन गरेका छन् । उद्घाटन समारोहमा कपिलवस्तु-२ का सांसद बृजेशकुमार गुप्ता, जिल्ला समन्वय समितिका प्रमुख बाबुराम आचार्य, बुद्धभूमि नगरपालिकाका मेयर केशव श्रेष्ठ लगायतको उपस्थिति थियो ।
शिक्षा क्षेत्रमा भारत-नेपाल विकास सहकार्य कार्यक्रम अन्तर्गत सामुदायिक विकास परियोजनाको रुपमा भारत सरकारको ३ करोड ४० लाख आर्थिक सहयोग लागतमा सो परियोजनाको निर्माण भएको हो । यो परियोजना भारत स्वतन्त्र भएको ७५ वर्षको उत्सव मनाउन भारत सरकारले अघि सारेको आजादीको अमृत महोत्सव अन्तर्गत यस वर्ष नेपालमा उद्घाटन गरिने परियोजनाहरु मध्येको एक हो ।
श्री माध्यमिक विद्यालय कपिलवस्तुको पुरानो विद्यालय मध्ये एक हो । यस नवनिर्मित पूर्वाधारले विद्यालयमा सिकाईका लागि उपयुक्त वातावरणको सिर्जना गर्ने अपेक्षा लिइएको छ ।
