योसँगै नामकरणमा पछि परेको प्रदेश १ सरकारलाई दबाब बढेको छ । दलहरु बिच सहमति नबन्दा प्रदेश १ को नामकरण थाँती रहँदै आएको छ । प्रदेश १ को राजधानी विराटनगर कायम भए पनि नामकरणबारे दलहरुबीच मतैक्यता छैन । प्रदेशको नाम भूगोल, पहिचान कि सभ्यताको आधारमा राख्ने भन्नेबारे दलहरुबीच विवाद छ ।
हाल प्रदेश १ मा पाँच दलीय गठबन्धनको सरकार छ । राजेन्द्र राई प्रदेश १ का तेस्रो मुख्यमन्त्री हुन् । यसअघिका दुई मुख्यमन्त्रीमध्ये शेरधन राईको पालामा प्रदेशको स्थायी राजधानीबारे टुङगो लागे पनि नामकरण हुन सकेन । दोस्रो मुख्यमन्त्री भीम आचार्यको कार्यकालमा प्रदेशको नामकरणसम्बन्धी विषय चर्चामा मात्र सीमित रह्यो । अब पाँच दलीय गठबन्धन सरकारको नेतृत्व गरेका मुख्यमन्त्री राजेन्द्र राईमाथि प्रदेशको नामकरणका लागि दबाब बढेको छ ।
